Zergaitik hil eben kurutzean Nazareteko Jesus?

Velazquezen Kistoa

Jesus nazaretarra, Jainkoaren Erreinuaren profeta maitagarria, gurutze baten josita hil zan gure aroko 30.urtean, apirilaren 7´an, ziur asko. Baina zein gaiztakeria egin eban Jesusek holako azken negargarria emoteko? “On egiten eta deabruak hartutako guztiak sendatzen”…Jainkoaren maitasuna eta errukia iragarten…arerioak maitatzeko eskatzen bizi izan zanak, merezi ete-eban holako esker txarrik?

Jesus ez zan inuzentea eta konturatzen zan Berak iragarten eban “Jainkoaren Erreinua” iragartea oso arriskutsua zala herri-agintarien, erlijio-agintarien eta era guztietako boteretsuen aurrean. “Erreinu” honen bidez Jesusek pobreen, behartsuen, baztertuen eta zapalduen zoriona nahi eban eta politika, erlijio eta boteretsu guztiok ez eben nahi euren egoerea aldatzerik.

Jesusek min emoten eutsen Israelgo Herri-agintariei, Erromako agintariei, Jerusalengo tenploko abadeei eta herriko aberatsei eta ezin eben ikusi euren begien aurrean.

Honetan, Jesusek bere adiskide Lazaro bizira erakarri eban eta jende askok Jesusegan sinistu eban. “Baina haretariko batzuk fariseuakana joanda, Jesusek egindako miraria azaldu eutsen. Orduan, Abadeburuak eta fariseuak Batzarra egin eben, eta hauxe inoen: “Zertan dihardugu? Gizon honek mirari asko egiten ditu. Horretan uzten badogu, danak sinistuko dabe beragan; eta erromatar agintariak, eskuharturik, hondatuko deuskuez gure Jerusalengo Tenplo santua eta gure Herria”(Jn. 11, 45-48).

Abadeburu zan Kaifasek, hauxe esan eutsen: “Konturatu zaiteze hobe dala gizon bakar bat herriagaitik hiltea, herri osoa galdu dadin baino”…”Eta egun haretatik Jesus hiltea erabagi eben. Horregaitik, harrezkero, Jesus ez zan judeguen artean agirian ibilten” (Jn. 11, 49-54).

Judas Iskariote, Jesusen 12 lagunen taldekoa zan ezkero, ba-ekian Kaifasek eta bere Batzarrekoek Jesus hiltea erabagi ebena. Bestetik, ikusirik, Jesusen lagun izanda ez eukala mundu honetan etorkizun haundirik, abadeburuakana joan zan eta hauxe esan eutsen: “Zer emon nahi deustazue, eta neuk ipiniko deutsuet eskuetan?. Hareek hogeita hamar zidar-diru eskaini eutsoezan. Eta harrezkero, Jesus harei saltzeko aukera bila ebilen Judas” (Mt. 26, 15-16).

Jetsemani zan aukerarik onena eta egokiena Jesus hareen eskuetan ipinteko, sarritan joaten zalako hara otoitz egitera. Jesusek eguen santuz ospatu eban Pazko afaria bere apostoluekin. Bere despedidako afaria zan. Eukaristia sortu eban, maitasunaren agindua emon eutsen eta bere bihotzeko mina agertzen deutse euretariko batek salduko ebalako. Judasi, barriz, holan esan eutson: “Egitera zoazena hainbat lasterren egizu”. Urten eban Judasek afari-gelatik eta joan zan bere asmoak betetzera. “Gaua zan”, dino ebanjelariak. Eta afaria amaituta Jetsemanira joan zan Jesus bere apostoluekin otitz egitera.

Giottoren Judasen musua

Otoitzean egozala, han non agertzen dan Judas tropel handi batekin eta musu maltzur batekin saltzen dau Jauna. Lotzen dabe eta handik zuzen abadeburua zan Kaifasegana eta bere Batzarraren aurrera daroe. Batzarrean ezin eben aurkitu ganorazko arrazoi bat heriotzako zigorra emoteko. Azken baten Kaifasek berak itandu eutsan: “Esan eiguzu, zu zara Mesias, Jaungoikoaren Seme bedeinkatua? Eta Jesusek erantzun: Bai, neu naz. Hori entzutean, Kaifasek bere jantziak urratu zituan eta esan eutsen batzarkideei: Entzun dozue biraoa. Zer deritxazue? Eta guztiak batera heriotzako zigorra merezi ebala ebatzi eben” (Mr. 14, 61-64).

Baina judeguek, erromatarren menpean bizi ziran ezkero, ez euken eskubiderik inori heriotzako zigorra emoteko. Horregaitik, Jesus hartu eta lotuta, Erromako gobernaria zan Pontzio Pilatorengana eroan eben, Jesus hilteko haren baimena behar ebelako.

Antonio Ciserriren Ecce Homo

Beste alde batetik, ondo ekien judeguek Pilatori ez eutsoela ardura ezertxo ere judeguen erlijioko arazoak. Adibidez, Jesusek bere burua Jainkoaren Seme egiten ebala-ta, hori ez zan bidezko arrazoia Pilatorentzat. Horregaitik, judeguek beste arrazoi batzuk ipini eutsoezan Pilatori:

-          Honek herri osoa naztatzen dihardu.

-          Honek dino ez jakola ordaindu behar zergarik Erromako Zesarri.

-          Honek dino berau dala judeguen erregea.

Salaketa guztiok guzurrezkoak ziran. Baina, Pilato Kaifasen adiskidea zan

ezkero, berari eta bere batzarrekoei kontraesanik ez egitearren, eta eurekin txarto ez geratzearren, Pilatok Jesus heriotzara eroateko baimena emon eutsen judeguei.

Miguel Angelen La pietat

            Honexek dira, gutxi gora-behera, Jesusen heriotza dala-ta, Ebanjelioetatik atara geinkezan giza mailako arrazoiak. Baina Jesusen heriotzaren helburua, erlejino edo politika arrazoi batzuk baino hurrunago doa:

a)      Jesus, Liburu Santuak inoenez hil zan. Hau da, Jesusen heriotza Jaungoikoaren salbamen asmoetan egoan.

b)     Jesus, geugaitik eta geure alde hil zan. Bere heriotza, salbagarri bihurtu zan guretzat. Gure pekatuetatik salbau ginduzan.

c)      Jesusen heriotzak, Jaungoikoaren gizonaganako maitasun neurribakoa agertzen deusku: “Hain maite izan dau Jaungoikoak mundua…bere Seme bakarra bialdu eban gure pekatuen ordain-opari”.

 

 

Garitaonandia eta Sardui´tar Jesus

  Begoñako Santutegiko Erretorea

  

Frantzisko Aita Santua

Aita Santu barri bat dogu!!  Eta pozteko arrazoi asko dagoz: pertsona apala, azkenengoen hurbila, hegoamerikarra, jesuita …  Aita Santu barri honek Frantzisko izena hartu dau. Eta aukeraketa hau oso esanguratsua da kristauentzat. Guztioi bi Frantzisko datozkigu burura. Bidean.net webgunean euren bizitzak topatu daikeguz :

Asisko San Frantzisko:

Italiako Asisen jaio zan 1182. urtean; eta 1226. urteko urriaren 3an hil zan. Bere eguna urriaren 4an ospatzen da. Frantziskotarren sortzailea izan zan; eta geroago Klaratar monjena ere bai.



Asisko San Frantzisko

Merkatari aberats baten seme izatetik pobretasun gorrian bizitzera jo eban bakardadeko bizitzan, bere buru eta bihotz Ebanjelioari lotuz. Gaztetan munduko sasi-artean katigu bizi izan zan, alperkerian eta nasaikerian. Halan ere, diru kontuan bihotz eta eskuzabal agertu zan beti, bai txarrerako eta bai onerako.

24 urteko zala, giro horretatik aldenduten hasi zan, burumakur eta pentsakor. “Zer, ezkontzeko arduraz kezkatuta ala?”, itandu eutson mutil bati, halako erantzuna emon eutson: “Bai, horixe bera: ezkontzekotan nabil, eta eskeini naiakon emaztea hain da ederra, hain ona, hain aberatsa, zuk holangorik ez dozu sekula ezagutu”. Goi argiz ezagutu eban Eleizea zan emaztegai hori.

Aitak inun diranak egin ebazan, semeari burutik amets horreek kentzeko; abade eta gotzain arazo horretan sartzeraino. Baina alperrik, Frantzisko berean gero eta sendoago. Jantzi eta apainkeri guztiak gotzainaren eskuetan itzita, bakardadera jo eban. Ermitatxo zahar baten aurkitu eban gordeleku bat, Kurutze ederra erdian ebala. Bere aurrean otoitzean egoala, Kurutzeko Jaunak dei egin eutson: “Frantzisko, zoaz eta erabarritu egizu nire Eleizea, dana bertan behera hondatua dago-ta”. Baina ez zan San Damian ermitatxoa bakarrik; Eleiz bizitza osoa egoan lurjota; hori zan Jaunak bere gain ipinten eban arlo ederra baizen astuna.

Frantzisko gazteak hartu eban bidea, bai zuzena eta garbia, baina latza. Uste baino lehenago batu jakozan hainbat gazte, bizibide barrian lagun izan gurarik.  Baina Frantzisko eukan garra behar barruan; laster sortu jakozan eten-urratuak lagunartean. Frantziskok aurrera egin eban, hasibarri zan lagunartea zuzentzeko Erromara jo eban laguntza eske. Espirituak eraginda, Jesus beraren irudi bizi bihurtu zan Frantzisko: Jaun Kurutzeratuaren zauriak ezarri jakozan gorputzean, otoitzean su ta gar egoanbaten. Izan ere, hori zan bere ardura nagusia.

Geldiezina bihurtu zan: Erromara, Aprikara, Jerusalenera, Konpostelara etabar bideak jorratu ebazan. Gaixoak, legenardunak, baztartuak ziran bere lagunak, euren artean harrigarriak eginez. Aingeruzko kontenplalari bihurtu zan, zeru-lur-itsasoetako gauza guztiak anai-arrebatzat hartuz. Eta bakezale eta bakegile aparta izan zan. Gaur ere gure artean sarri erabilten dogu harako bere “Bake-otoitza”.

Jauna, egin gaizuz zure bakearen zerbitzari.

Gorrotoa nagusi dan lekuan,

guk maitasuna jarri daigula,

iraina nagusi dan lekuan, barkamena jarri daigula,

haserrea nagusi dan lekuan, batasuna jarri daigula,

gezurra nagusi dan lekuan, egia jarri daigula,

zalantza nagusi dan lekuan,

sinismena jarri daigula,

etsipena nagusi dan lekuan,

itxaropena jarri daigula,

ilunpean nagusi dan lekuan, argia jarri daigula,

tristura nagusi dan lekuan poztasuna jarri daigula.
 

Gure jokabide izan dadila, Jauna,
ez gu poztuak izatea, guk poztu daigula baino,

ez gu onartuak izatea, onartu daigula baino,
ez gu maitatuak izatea, maite daigula baino.

Izan ere, Zuk erakutsi deuskuzu, emotea dala, hartzaile izateko bide;
norberaz ahaztea dala, nork bere burua aurkitzeko bide;
eta hiltzea dala guretzat, betiko bizitzara berbizteko bide.

 
44 urteko zala hil zan, baina mundua Jesusen usain gozoz bete ondoren. Gizaldietan zehar bizirik dirau San Fantziskoren aztarrenak.

 Xabiereko San Frantzisko:

XABIERKO FRANTZISKO, Xabierko gazteluan jaio zan 1506. urtean; Jassutar Joan eta Azpilikuetatar Maria izan ebazan guraso, Naparroako jatorri ospetsuaren babesean. Urte berean hil zan Colon, mundu barria aurkitu eta Ebanjelioarentzat ere bide barriak zabaldu ondoren. Urte batzuk geroago, Xabier santuak zabalduko ebazan sortalderako Ebanjelioaren bideak, India eta Japon lurraldeetara.

Bere aita Naparroako erregearen kontseilari izan zan, eta Kastilarrak Naparroa menderatu ebenean hil zan. Bere anaiak su ta gar zaindu eben lurralde hau, Iruina eskuratzea lortu eben (Loiolako Inazio Kastilatarren buruzagi zala).

Parisera joan zan gazterik ikasketak egitera, gogo beroz eta burua argiz filosofiako maisu distiratsua izatera helduz.

Xabiereko San Frantzisko

Hemen jatorko JAUNAREN DEIA, Loiolako Inazio bitarteko zala. 1525. urtean egin ebazan erlijioso botoak, Inaziogaz batera.

Hasieratik bere misiolari garra eutsi ezinik, Indietara jo eban eta 1542. urtean heldu zan Goara. Halako sailak aurrean ikusita, Xabier geldiezina zan: bertako hainbat hizkuntzetara jarri ebazan kristau sinismeneko egiak eta otoitzak. Harritzekoak egin ebazan misiolari lanetan: ezin-zenbatu ahala bateatuak, astunak eta arriskutsuak bere gain Eleizeak jarritako arazoak (Aita Santuak bere ordezkari izendatu eban Sortalde osorako).

Eta 1552. utean, abenduaren 3an hil zan Xabier, 46 urteko zala. Bere heriotzako ataltxo bi azpimarratuko doguz: hilten egoala ahopean otoitzean ziharduala, inok ulertzen ez eban hizkuntzan entzun eutsoen; askoren ustez Euskeraz; zeozegaitik da Euskeraren zaindari; eta bigarrena, Xabier hilten egoala, Xabierko gazteluko Santokristoak odol tantak ixuri ebazala.

Xabiereko San Frantzsikoren Misiolari Bidaiak

Pio X. garrenak Sinismen Zabalkundearen zaindari izendatu eban. Berau dogu, gainera, Jesus Umearen Teresatxo doneagaz batera, Misino eta Misiolari guztien zerutar eredu eta zaindari.

 

Sixtoren Kapera 360º

Giulio Origlia - Getty Images

‘Oscar’ berezia gazteentzat

Joan dan zapatuz emon jakon hasierea ‘Ikusiz ikasi’ VI. zine asteari, taldeei, familiei, eta, orokorrean, zinea ikusi gura eben guztiei zuzendutako saio irekiagaz, 11:00etatik 13:30etara Bilboko Zubiarte zinemetan. Saioetan ez zan aparteko gorabeherarik izan eta 650 lagun batu ziran, “Soul Surfer”, “Mundu hobean” eta “Maktub” pelikulak ikusteko.

---

 

Gazteen idazkaritzatik jakitera emoten dabenez, saio irekian hainbeste jente eta hain plurala batzeak “jenteak irrikatzen dauan jarduera erakargarria” dala baieztatzen dau. Partaideak, Pastoral Barruti desbardinetako (Meatza ingurua, Santurtzi, Portugalete, Sestao, Barakaldo Erdialdea, Barakaldo Kanpoaldea, Gueñes, Basauri, Galdakao, Zornotza, Arratia, Durango, Oiz-Anboto, Algorta, Mungia eta Bilboko PB gehienak) plataforma desbardinetakoak (gaztetxoen taldeak, sendotzako taldeak, EEB, EKO-ACG eta JOC mobimentuak, ITAKA lako komunidadeak, ikastetxeren bat edo beste) ziran.

‘Ikusiz ikasi” jardueraren helburu nagusia “giza balioak eta balio espiritualak lantzea” da, zinea hezkuntza baliabide lez hartuz. Hori lortzeko, pelikula ikusteaz gainera, gazteek, azaltzen dau Maria León antolaketaz arduratu dan taldeko kideetako batek, pelikulan nabarmentzen diran gaietan sakondu daikie “erlijinoko irakasle batzuek prestatu dabezan eta urteeran banatu diran gida didaktikoen bidez”.

Landu gura dabezan guztiek Gazteen Elizbarrutiko Idazkaritzan eskuratu daikiez gida didaktiko honeek. Beste alde batetik, “Mundu hobean” eta “Maktub” pelikulak ikusi ebezan gazteek forum labur baten parte hartzeko aukerea izan eben azkenean. Holan, antolatzaileek dinoen lez, hurrenez hurren Julio Cuadral eta Emilio Mañasek lagunduta, “argibideren bat jaso ahal izan eben aurkeztutako gaietan sakontzen jarraitzeko”.

‘Ikusiz ikasi’ zine asteak gaurtik aurrera jarraituko dau barikura arte ikasleentzako saioekin, Zubiarte zinemetan. Zornotza Aretoan eta Gernikako Kultur Etxean be izango dira emonaldiak.

Lipdub harmonikoa

Saio irekiaren ostean, gaztetxoen topaketa ospatu zan. Neska-mutikoek pelikulen gai nagusiak jorratzen jarraitu eben, lipdub dibertigarria prestatuz. Oraingo honetan, gaztetxoak eurak izan ziran filmazioaren protagonista nagusiak.

“Talde desbardinetao 50 gaztetxo inguruk, adiskidetasun-lokarriak estutu ebezan, arratsalde atsegina igaroz”, dinoe azkenean topaketaren antolatzaileek.

Bizkeliza webgunetik hartuta.

Bihar ospatuko da gaztetxoen elizbarrutiko topaketa

IKUSIZ IKASI’ VI. ZINE ASTEA bihar, otsailak 23 hasiko da saio irekiekin eta datorren astean, otsailaren 25etik martxoaren 1era, izango dau jarraipena eskoletako ikasleentzako saioekin. Ekitaldi honetan, bihar, saio irekien egunean, gaztetxoen elizbarrutiko topaketa ospatuko da. Jarduera biei buruzko informazinoa jasoteko eta batean zein besteak izena emoteko: www.bizkeliza.org/ikusiz-ikasi

---

‘Ikusiz ikasi’ zine asteak, Gazteen Elizbarrutiko Idazkaritzak eta Hezkuntzarako Elizbarrutiko Ordezkaritzak antolatutako ekimenak, seigarren ekitaldia dau aurtengoa. 2013. urte honetan, Fedearen Urteagaz bat, gai honen inguruan izango da: “UNA FE DE CINE – IKUSI, IKASI, SINETSI”, eta ondorengo pelikulok ikusi ahal izango dira: “Zigortzaileak”, “Soul surfer”, “Mundu hobean” eta “Maktub”. Euskera eta gaztelania konbinatuz emongo dira. Alde batetik, ikastetxeetako lehen hezkuntzako bosgarren mailatik batxilergora arteko ikasleentzako saioak izango dira eta, bestetik, saio irekiak, gazteentzat, hezitzaileentzat, familientzat eta, orokorrean, ikusi gura dabezan guztientzat.
Beraz, biharko egunez, zapatuz –otsailak 23-, hasiko da zine astea Bilboko Zubiarte zinemetan goizeko hamaiketatik aurrera, hiru pelikularen emonaldiagaz. Horreetako batzuen ostean, forum laburra egongo da, giltza pedagogiko eta pastoraletan sakondu ahal izateko. Ikastetxeetako ikasleentzako saioan datorren astean ospatuko dira, goizez, otsailaren 25etik 27ra Bilboko Zubiarte zinemetan, otsailaren 28an, Zornotzan eta, barritasun lez, martxoaren 1ean, Gernikan.

Sarrerek hiru euro balio dabez persona bakotxeko. Ikastetxeetako ikasleek aurretik emon behar dabe izena web orrialdearen bitartez. Aurtengo barritasun lez, saio irekietarako be erosi daiteke sarrera aldez aurretik, web orrialdean jasoten diran baldintzetan. Dana dala, saio irekiaren egunean bertan be erosi daiteke sarrera, pelikula hasi aurretik, leihatilan.

Pelikula bakotxaren ildo nagusietan sakontzen laguntzeko, pelikula ikusi aurretik egiteko dinamika batzuk prestatu dira eta web orrialdean dagoz eskuragarri. Eta, gainera, emonaldi bakotxaren ostean, gida didaktikoak banatuko jakez neska-mutikoei eta gelako lana suspertzeko gidak irakasleei.
Programazinoari, pelikulen emonaldien ordutegiei, izena emoteko jarraibideei eta, batez be, pelikula bakotxaren gai eta biderapenari buruzko informazino guztia www.bizkeliza.org/ikusiz-ikasi aurkitu daiteke zehaztasun handiz.

Gaztetxoen Elizbarrutiko topaketa

Kurso honetan, antolatzaileen beste urrats bat emon gura izan dabe, hirugarren barritasun bat sartuz: biharko –zapatua, otsailak 23- saio irekiaren ostean GAZTETXOEN ELIZBARRUTIKO TOPAKETA – “GEURE LIPDUBA EGINEZ” dalakoa ospatuko da. Bertan, hamabost eta hamazortzi urte bitarteko neska-mutikoek euren sormena jarriko dabe jokoan eta protagonista sentituko dira.

bizkeliza.org webgunetik hartuta

Karnabalak eta Garizumea

Zanpantzarrak Portugaleten

Hautserre eguna da Garizuma aldiaren hasierako eguna. Eta garizuma aurreko domekan, hain zuzen,  Bizkaiko herri askotan, eta lagunarte giroan, "basokoipetsuak", "sasikoipetsuak", "basatosteak", "kanpora-martxoak" edo "txitxiburduntziak" ospatuko ziran.

Egunotan, inauteri, haratuste edo karnabal egunetan gagoz bete-betean. Zuberoako "maskaradak", Lapurdi ta Benaparroako "kabalkadak", Naparroako Ituren eta Zubietako "zanpantzarrak" martxan doaz. Arabako Zalduendon “Markitosen” pasialdia eta bere azken-epaia ospatuko ditue. Mundakako "Atorrak-musika taldea” osotzen dabenak hor dabiltz kantu-kantari. Markinako zaragi-dantzakoak, "Hartza" lagun dabela, euren kalejirak egiten dihardue. Baita beste karnabal talde guztiak ere egun hauetan urtengo dabe kalera euren jaiak ospatzera.

Gotzainaren gogoeta krisiari buruz

Bilboko gotzainak zabaldutako mezuan eskari bat egiten dau: “barriro pentsatu eta hausnartu beharko geunkez gure ekonomiaren euskarri diran printzipioak”, bere ustez, “guztion ongizatearen, gizon eta emakume guztien duintasunaren, zuzentasunaren eta gizartearen sustapenerako balio daben” egiaztatu beharra dagoalako.

Izeta gotzainaren ustez, langabetuen kopuruak maila “jasanezinetan” dagoz eta honako hau “gaur egungo egoeraren ondoriorik dramatikoena” dala adierazoten dau.

Gotzainak egiten dauan hausnarketan, behin baino gehiagotan aitatzen dau lan duina suspertzeko beharrizana, “lana edozein preziotara sortzea” desegokitzat joteaz batera. Ikuspuntu honen aurrean, on Mario Izeta gotzainak Elizearen Doktrina Soziala darabil bere hausnarketaren oinarri lez, bertan hauxe esaten dalarik: “Enpresak alkarte solidarioa izan behar dau, interes korporatiboetan itxita geratu barik, lanaren ekologia sozialerantz jo behar dau eta guztion ongizatean, baita inguru naturalaren zaintzan be, lagundu egin behar dau”